ФФМ официјално се обрати до УЕФА за одложување на натпреварот со Косово, полуфинале на Лигата на Нации која треба да се одигра на 26. март во Скопје.

Покрај проблемот со препораките на Валдата на Македонија оваа средба да се игра без присуство на публика, поголем проблем е што фудбалерите кои пристигнуваат во нашата држава од Италија мораат да одат во евентуална изолација/карантин.

Ова се вонредни причини, ФФМ е во постојана комуникација со надлежните министерства и институции се вели во соопштението на федерацијата.

Соопштението ви го пренесуваме во целост:

Фудбалската федерација на Македонија официјално со допис до УЕФА побара одложување на натпреварот меѓу Македонија и Косово од полуфиналниот бараж натпревар за пласман на Европското првенство, закажан за 26. Март 2020. на Националната арена „Тодор Проески“ во Скопје.

Во дописот до Европската куќа на фудбалот, покрај проблемот со гледачите (забрана од македонската Влада за присуство на публика), ФФМ го потенцира проблемот со пристигнувањето на фудбалерите од репрезентацијата во нашата држава, односно евентуалната изолација / карантин за одредени фудбалери кои би пристигнале од земјите со висок степен на присуство на вирусот COVID-19.

Токму поради овие вонредни причини, Фудбалската федерација на Македонија е во постојана и интензивна комуникација и со Министерството за здравство и Институтот за јавно здравје и во целост се придржуваме кон нивните препораки, донесените мерки или забрани.

Исто така, по консултации со претставници на Фудбалските федерации на Грузија и Белорусија, една од двете држави кои беа одредени за домаќини на финалниот натпревар од Лига на нации на 31. март за пласман на ЕУРО 2020, неофицијалните информации велат дека е можно, репрезентацијата која би обезбедила пласман во финалето, да се соочи со одредени мерки на претпазливост за здравствена заштита при влез во една од државите. И во однос на ова, ФФМ, исто така е во постојан контакт со споменатите федерации и УЕФА.

Согласно последните препораки и забрани од Владата на Македонија за превенција од вирусот COVID-19 , Комисијата за младински фудбал донесе одлука сите натпревари во младинските конкуренции и натпреварите од Детските лиги на ФФМ да се суспендираат во наредните две седмици.