Македонската кошаркарска селекција за играчи под 20 години со победа го започна настапот на  ФИБА „Челенџер“ турнирот во Шопрон. Во второто полувреме го скршивме отпорот на Луксембург, за покачување на потребната самодоверба и она што следува понатаму.

„Мислам дека игравме и премногу во некој грч, евидентиран во тоа прво, лошо, полувреме. Сепак, треба да се земе в предвид дека четворица кошаркари во овој тим имаат некое поголемо искуство на играње на вакви, европски натпревари. Не сакам да се навраќам дека уште четворица не се тука со нас. Но реков, оние кои сум ги одбрал се тука, ќе играат, со максимум од своите можности. Уште денеска очекувам да изгледаме многу подобро“– анализира селекторот Тони Симиќ.

Македонија денеска од 16.30 часот, ќе се соочи со Романија.

„Загубија убедливо од Швајцарија, гледавме ‘во живо’ две четвртини од тој натпревар. Резултатот не смее да нè залаже. Факт е дека Швајцарија е одлична екипа. Романската е доста физички посилна од нас. Тука ќе биде основниот наш проблем на овој турнир. Ме загрижува скок-играта. Во оие први 40.минути на противникот му дозволивме да нè натскока, и тоа убедливо. Мора многу подобро да го затвораме нашиот рекет. Да се обидеме да ‘фатиме’ и некој офанзивен скок. Романците се физички посилни, ќе мора да ги удвојуваме во рекетот, и да ги спречиме нивните „втрчувања’ кои доста често ги користат за поентирање. Ако тука бидеме добри, мислам дека можеме да стигнеме до нов успех“– дополнува Симиќ.