Најтрофејниот клуб кога станува за Куп натпреварувањето во женска конкуренција, Бадел 1862, сака да се врати на престолот на кој во последните три изданија (2017, 2018 и 2019 година) ’царува’ ЖКК Вардар.

Вардарки, очекувано, велат дека продолжување на победничката низа е императив за нивниот состав. Противниците на Бадел 1862, клубот Крива Паланка, се желни за испишување на клупска историја и китење на клупските витрини со престижниот трофеј. За ЖКК Баскет Кам 2011 ова е прва натпреварувачка сезона, но од тимот најавуваат дека имаат доволно искуство и дека не треба да бидат сметани за аутсајдери.

 

Перо Стамевски, тренер ЖКК Бадел 1862

„Пред се би посакал добро здравје на сите екипи, добра игра и квалитетни натпреаари. Нашата цел прво е пласман во финалето, а пред да се стигне до таму мора да се изигра полуфинале со Крива Паланка. Ќе сториме се да влеземе во тоа финале, ќе се подготвиме колку што имаме уште два-три дена и ќе дадеме се од себе. Во финалето се е можно. Посакувам најдобрата екипа да го освои пехарот“.

Сања Адамоска, капитен ЖКК Бадел 1862

„Би сакала да им честитам на сите екипи кои обезбедија учество на турнирот, Како што кажа и Генералниот Секретар, мислам дека оваа година натпреварите, а и самиот квалитет ветува интересна кошарка. Самата Супер лига од натпревар во натпревар е со зголемен квалитет и сè поголема неизвесност. Не би сакала да издвојам фаворит бидејќи сите екипи ветуваат. Во име на мојата екипа можам само да кажам да гарантирам дека ние ќе дадеме се од себе и дека ќе се обидеме да го освоиме Купот“

Ирена Белешковска, технички раководител Крива Паланка

„Задоволство ми е што првенството стигна до некоја завршница и покрај предизвиците кои ги диктира пандемијата. Драго ми е што сите сме пред прагот на завршницата од овој Куп. Од името на КК Крива Паланка би сакала да истакнам дека можеби сме најмладиот тим којшто влезе во Супер лигата и како таков бевме изненадување, но иако сме млади сме и амбициозни. Така влеговме во секој натпревар и секој натпревар што успеавме да го добиеме за нас беше како освојување на првенството. Горди сме што сме дел од големата четворка со која дојдовме со млади играчи со просечна возраст од 15 години, како и двете засилувања Марија Петровиќ и Милена Марјановиќ, како и во стручниот штаб со господинот Слаѓан Ивиќ. Успеавме за месец, месец и половина да направиме компактност и тим којшто со срце се движеше од натпревар во натпревар. Така ќе настапиме и во Купот. Се надевам дека ќе продолжиме да изненадуваме и понатаму“

Ксенија Петревска, капитен Крива Паланка

„Честитки до клубовите кои се пласираа на завршницата. Ние сме релативно млад клуб, но сме упорни и амбициозни и ова го постигнавме со работата од изминатите години. Голема благодарност до кошаркарките, моите соиграчи, но и особена благодарност до тренерите кои имаат трпение да го постигнат сето ова со нас. Благодарност и до нашите Мими и Маја кои ни помогнаа да се најдеме тука каде што сме сега и се надевам дека ќе нанижеме уште некој успех“.

 

Четирити екипи ќе си ги одмерат силите во полуфиналните дуели, закажани за претстојниот петок (7. мај), а победниците од овие дуели ќе се пресметаат и ден подоцна во рамки на финалниот дуел. Сите натпревари ќе бидат одиграни во СРЦ „Кале“ (голема сала).

Двојки:
(1) Бадел 1862 – (4) Крива Паланка
(2) Баскет КАМ – (3) Вардар