Денеска во хотелот „Александар Палас“ во Скопје со почеток од 18 часот ќе се одржи Изборно Собрание на Македонскиот олимписки комитет, уште не започнато го следат скандали, еден од кандидатите, Александра Војнеска Зикова е „избришана“ со мислење на Управниот одбор дека не ги исполнува условите како кандидат, иако нејзината кандидатура претходно не беше оспорувана.

Се огласија 18 спортски федерации кои не се сложуваат со оваа одлука по која Даниел Димевски  е единствен кандидат за наследник на Васил Тупурковски.

Челниците на МОК заборавија на основните начела на олимпиското движење, го сфаќаат како приватна забава и фамилијарен бизнис.

Групата на делегати кои ќе гласаат денеска на Собранието а кои ја поддржуваат Војнеска се заканија дека ќе поднесат кривични пријави, соопштението го пренесуваме  во целост:

Првите луѓе на Олимпискиот Комитет Васил Тупурковси и генералниот секретар Сашо Попоски уште еднаш покажаа дека олимпиското движење го сфаќаат како нивна приватна забава и фамилијарен бизнис, рушејќи ги сите начела на олимпизмот со недозволување на демократија, јавност во работењето и нормално спортско функционирање.

Ние, како спортски федерации од олимписките спортови во Македонија, веќе неколку години се бориме за да се смени овој начин на функционирање на Олимпискиот Комитет, а случувањата од последниве неколку дена уште еднаш ни потврдуваат дека нашата борба е оправдана.

Ние само бараме коректно изборно собрание по сите законски норми, без сопки и игранки од секретарот Поповски. А во духот на олимпизот нека победи подобриот.

Прекршувања на Статутот, злоупотреба на законите, но и заобиколување на олимписките начела има многу, но ќе наведеме само неколку

Прво, Управниот одбор самостојно презема ингеренции на Собранието и се стави над над него како највисок орган, со донесување на ограничувачки и дискриминаторски критериуми при кандидирање што е незаконски и не е предвидено во Статутот.
Второ, затоа што се прифаќа како делегат во Собрание претставник на непостоечка пливачка федерација, а не се прифака претставник од законската федерација, која е запишана во Централниот регистар.
Трето, на чуден начин на 24 часа пред одржувањето на Собранието, нестатутарно е доведена во прашање кандитурата на еден од кандидатите, со што е направено грубо прекршување на изборниот процес.
Четврто, од страна на Олимпискиот Комитет се испраќаат полномоштва до Федерациите, за тоа кој треба да биде делегат од Националната федерација, наместо Федерациите кои се членови на Собранието сами да си го определат претставникот.

Заради сите овие прекршувања и злоупотреби и нашите очекувања тие да продолжат и на денешното Собрание, а изборот да се претвори во фарса креирана од Тупурковски и Поповски, сакаме да ги предупредиме дека нема да го толерираме тоа и ќе бидиме принудени да поднесеме кривични пријави за злоупотреба на службена положба и фалсикување.