Откако било потврдено дека тренер по џудо бил приведен по сомневање дека силувал малотени девојчиња во Прилеп, од Џудо федерацијата на Македонија излегоа со соопштение до јавноста.

Во соопштението наведуваат дека се згрозени од настанот и дека лицето кое е осомничено за „обљуба со злоупотреба на положба“ ја загубило лиценцата поради злоупотреба на официјални документи.

„Во однос на последните информации за приведување на еден поранешен тренер по џудо, Македонската Џудо федерација би сакала да го даде следното појаснување. Во врска со последните случувања поврзани со обвинувањата за злоставување малолетнички од тренер по џудо, згрозени сме од информациите во јавноста и очекуваме брзо разрешување на случајот. Веруваме дека истрагата целосно ќе го расветли случајот за што како Федерација сме целосно на располагање на истражните органи. Посочениот тренер одамна не е член на федерацијата и уште минатата година беше дел од дисциплинска постапка поради злоупотреба на официјален документ испратен од Светската Џудо Федерација како и поради прекршување и непочитување на Статутот и други мерки и протоколи. Поради оваа дисциплинска постапка, одземена му е лиценцата за тренер по џудо и исфрлен е од Џудо федерацијата на Македонија, за што официјално беа известени сите надлежни институции вклучувајќи ја и Агенцијата за млади и спорт.“ – стои во соопштението на џудо федерација на Македонија.