Алжирскиот голман и член на европскиот ракометен клуб Вардар Калифа Гедбан во кратко интервју за веб-сајтот на ЕХФ зборуваше за завршниот турнир во Келн и за неговата адаптација во Скопје.

„Ми беше многу тешко на почеток, бидејќи се случија неочекувани проблеми. Откако се решија, ние одлучивме да го направиме горд македонскиот народ и дадовме 1.000% од нас. Победата во финалето на Лигата на шампионите беше најубавиот момент од мојот живот. Секогаш имам посебно чувство кога ќе се потсетам на последниот судиски свиреж“, вели Гедбан.

Алжирецот зборуваше и за соработката со легендарниот тренер на голманите и некогашен голман Дејан Периќ.

„Учам секој ден колку што можам од Дејан. Но, знам дека ништо не е научено по само една година. Оваа сезона ќе биде уште потешко да се стигне до Келн, бидејќи ракометот се развива и е на уште повисоко ниво“, вели Гедбан во интервјуто за ЕХФ.

Алжирецот во текот на викендот ќе се приклучи на подготовките на вардарци, кои ќе заминат во Требиње.